若要人不知，唔好咁低Ｂ。呢句電視劇金句，送畀民航處處長羅崇文就啱晒喇，事關呢位仁兄將民航處大樓當成自己嘅私人王國，要幾豪有幾豪，以為神不知鬼不覺，結果梗係難逃正義傳媒嘅法眼，將佢嘅劣行公諸於世喇。
好嘞，大花筒醜聞被本報踢爆後，審計署加入調查，結果揭發羅崇文「十宗罪」，包括擅自擴建大樓面積一千五百平方米、擅自興建處長私人浴室、擅自改建舞蹈室及Ｋ房等等，簡直當正自己土皇帝咁款。嗱，尋日立法會政府帳目委員會公審羅崇文，委員火力全開，點知佢死性不改，仲要賴三賴四，企圖蒙混過關，簡直畀佢吹脹。
聽吓羅崇文點噏啦。佢話喎，擴建地方係同下屬溝通不足，自己並不知情，只需負上督導責任；而擅建處長浴室，係因為自己需要指揮長程搜救，有實際需要咁話。喂，家陣大樓大嗱嗱多出一千五百平方米，仲要政府及負責撥款嘅立法會毫不知情，如果冇處長指示，邊個下屬會咁大膽呀？擺明狡辯啦。仲有吖，羅崇文係首長第六級官員，根本冇資格擁有私人浴室，產業署亦早已表明唔同意興建，佢竟然自把自為，係都要整個「羅馬浴場」畀自己歎，足有二百呎咁豪，大過好多人嘅蝸居呀，唔係窮奢極侈係乜吖！
咁仲唔止，民航處耗費九千七百萬元購置家具及設備，其中價值逾六千七百萬元嘅保安及電子系統係先斬後奏，而購置嘅一百四十三部液晶體顯示器，亦較獲批嘅五十部多出近兩倍，直情唔當公帑係錢。最離譜嘅係，羅崇文老婆鍾意跳舞，有人擅將教育徑觀景廊改為舞蹈室。正如立法會議員話齋，呢啲醜聞如果發生喺民主地方，涉事官員一早落台喇，家陣羅崇文仲可以印印腳做處長，市民唔眼火爆就奇喇。
冇計喇，上樑不正下樑歪，一日最衰都係前特首貪曾爵士，佢帶頭貪飲貪食，而廉署調查近三年都冇佢符，咪搞到個個有樣學樣，一丘之貉咯。唔怪得有人話香港早就冇咗一國兩制，變成一國一制喇，事關香港貪官嘅腐敗程度，拍得住內地貪官有凸。講開又講，家陣內地大力反腐，蒼蠅老虎一起打，好過香港多多聲。難為香港自詡係廉潔城市、法治之區喎，真係唔知醜字點寫。
嗱，對於今次事件，運房局局長張炳良實牙實齒話會嚴正處理，追究到底，千祈咪得個講字吖。計功夫茶話齋，內地打老虎，香港點都要拍蒼蠅o架，如果民航處貪官仲唔落台，唔該張局長唔好再尸位素餐嘞。