探射燈：瑞士鑽錶 內地炒價愈升愈有
名錶近年深受各階層喜愛，不少年輕人加入收藏行列，不再只是成熟男士的身份象徵。但亦有名錶愛好者坦言，名錶被內地人炒高價格，轉向收藏更具價值的珠寶。
有人轉投資珠寶 價格失控
「幾萬至十幾萬嘅名錶都有好多愛好者選擇，佢哋依家會偏向追求特色款式，例如外形較立體嘅名錶。」歐洲坊集團行政總裁邱子傑指，近年亦有不少女士喜愛收藏名錶，「女士會鍾情珠寶款式名錶，比較有創意嘅，唔再係單式化款式。」
香港旅遊作家項明生，過往到訪各地都會到拍賣場競投心水名錶，但近年卻忍手不買，「十年前買二手錶、古董錶，價錢係好合理嘅，但依家內地人炒高晒價格，明明幾萬蚊買到，炒到幾十萬，完全唔值。」他指，近年轉向購買更高價值的珠寶，如鑽石、紅寶石等，「平時一隻瑞士錶鑲好少鑽石已經幾萬蚊，但單買幾萬蚊鑽石就已經好多。」