政情：胡志偉謀做「白鴿」頭
民主黨（白鴿黨）今個月將會選出新嘅正、副主席。白鴿黨過往成日畀人話佢哋選主席只係一場樣板戲，不過今次佢哋嘅選情似乎比過往激烈，參選主席嘅候選人有四位，其中一位仲係佢哋嘅立法會議員胡志偉。問到志偉點解突然參選，佢就話希望可以喺白鴿黨新舊交替上起到作用喎。唔通志偉想話畀大家知佢仲係新人、依然好年輕？
今次報名參選主席嘅包括現任主席劉慧卿、南區區議員區諾軒同志偉，而參選副主席嘅就有現任副主席羅健熙同葵青區議員尹兆堅，而該黨吳永輝更加係兩個職位「通殺」。突然冒出參選嘅志偉就話，白鴿黨上一屆已開始想進行新舊交替，可惜效果唔大，睇到台灣嘅選舉同區諾軒有關黨內應該做好世代交替嘅文章後，都希望自己可以為白鴿黨嘅更替起到轉折作用。
區諾軒就話，志偉報名前都有同佢傾過，覺得比起志偉自己資歷尚淺，相信志偉撼贏卿姐嘅機會大啲。不過只要黨內做到新舊交替，「功成不必在我」咁話喎。