中環出更：「一舊雲」亂咁申訴清場
尋日申訴專員劉燕卿（Connie）到立法會簡報申訴專員公署過去一年工作，平時對官員批評不留情面嘅議員們一反常態，冇抽秤公署不特止，仲齊聲讚揚公署表現令人滿意。唔知係咪冇嘢可以鬧人，議員們藉機申訴自己苦況，有人勁呻在區內屋邨冇位貼海報，有人問公署會唔會調查警方點樣處理佔領區嘅清場行動，真係令人啼笑皆非。
變咗議員呻苦況
有份申訴張貼海報嘅包括何秀蘭及陳恒鑌（Ben），何秀蘭話，隨着政治氣氛日益緊張，房屋署似乎收緊咗屋邨張貼海報。阿Ben隨即打蛇隨棍上，猛呻自己海報唔涉及敏感議題，但依然冇位貼，而被區議員霸晒。小組主席梁君彥對議員離題似乎不以為意，當陳婉嫻想問黃大仙區要求設立急症室，但拖咗幾十年仍未成事時，梁君彥話議題「唔關專員報告事」，但仍然批准佢發問。
民主黨黃碧雲（一舊雲）最離譜，佢問公署會唔會調查警方點樣處理清場，以及點樣監察警察投訴科同監警會。Connie就冇好氣咁話，專員無權監察警方。咁又係，監察警方唔係監警會嘅工作咩？作為監警會成員嘅一舊雲唔通真係遊咗魂？
卓妮