江山易改，本性難移。呢，人稱「李漢奸」嘅李柱銘尋日又試上演「義犬報恩」戲碼，趷個頭出嚟為英國主子發聲啦。唔係賣花讚花香，功夫茶早喺十幾年前就將「漢奸」狗牌掛喺佢頸上，係咪幾有先見之明呢！
話說佔領行動死唔斷氣，英國議會外交委員會計劃派員嚟香港評估《中英聯合聲明》嘅落實情況喎，擺明玩嘢，結果被北京嚴詞拒絕，簡直係咎由自取。件事引起好大反響，好多人鬧爆，點知護主心切嘅李漢奸第一時間撲出嚟幫手解畫，話英國國會派員來港，只係了解英國政府提交國會嘅報告係咪屬實，而唔係要監督特區政府喎。
嗱，呢啲咪叫巧言令色囉。成件事好清楚，《聲明》只涉及中英雙方就香港過渡期嘅安排，並冇半粒字提到回歸後嘅政制發展，更莫講話「普選」嘞；仲有吖，香港係中國嘅一部分，而中國作為主權國家，完全有權決定放行邊啲人入境。正如北大人話齋，英國對香港既無主權，亦無治權，更加無監督權。講得白啲，英國佬其實只係路人甲乙丙，根本冇資格對香港事務指手畫腳，更何況係佢哋養嘅一隻狗呢？
講真，英國今次派乜鬼調查團來港，真係同李漢奸有關o架。佔領爆發之前，佢同「民主阿婆」陳方安生聯袂到英國「哭秦庭」，唱衰香港之餘，又哀求舊主子干預香港事務，仲埋怨英國拋棄香港添。家陣英國咪就係應洋奴漢奸要求，嚟香港為佢哋撐腰打氣，為佔領行動撥火咯。
即係咁，養狗千日，用在一時，李漢奸口口聲聲「日日做漢奸」、「有需要就做漢奸」，又點會放過任何討好主人嘅機會吖。如果依家仲係鴉片戰爭時嘅滿清，英國仲係日不落帝國，李漢奸做帶路黨必定重重有賞，分分鐘變成引清兵入關嘅吳三桂第二添。可惜吖，今時唔同往日，中國已經崛起，貴為全球第二大經濟體，而英國恃強凌弱嘅時代一去不復返，依家掉番轉頭係英國唔敢得罪中國。大家睇吓前排總理李克強訪英，獲超高規格接待，連英女王都唔敢怠慢，親自出迎。唔怪得有人分析，英國佬今次話要組織咩調查團，都係跌落地揦番拃沙，做吓樣嘅啫，李漢奸咁賣力表忠，實在係太傻太天真，到頭來盞自取其辱嘅咋。
一句講晒，政治無永遠嘅朋友，只有永遠嘅利益，呢場所謂外交風波，最終咪又係英國向中方叩頭了事？不過咁，洋奴漢奸賣港求榮嘅歷史罪行，絕對唔可以好似粉筆字咁抹咗去。大家有眼睇，自古以來做漢奸嘅冇一個有好下場，李漢奸又點可能例外吖。