政情：公民講場：學生另起爐灶 想踢雙學落台

學聯與學民思潮因為唔認同佔中三子、泛民嘅保守路線，結果吸納到唔少對主流泛民失去信心嘅市民支持。但歷史永遠不斷重複，當「雙學」想吸納更多主流民意時，又被更激進嘅佔領者嫌唔夠進取。最近就有學生另起爐灶，成立一個名為「學生前線」嘅組織，其社交網站專頁短短兩日已有過萬人支持。講得好聽啲，呢種行為叫各有各做，但講白啲就係叫狙擊「雙學」。呢班前線學生不滿雙學霸佔「大台」、不滿糾察阻撓武力衝擊，結果迅速吸納一批激進佔領者同網民支持。睇嚟隨時喺警方進行清場前，「雙學」已經會畀呢啲更激進人士清走。