財政司司長曾俊華（鬍鬚曾）每逢星期日都會撰寫網誌，就最新政經大事作評論，最新一篇本來係講青年人創業精神，但講講下又借題發揮，疑似以創業者類比佔領人士，指創業者要有準備承受挫敗，仲要有智慧喺適當時間離場，藉此減少損失。唔通鬍鬚曾以為借題發揮得多，佔領人士終有一日就會回頭是岸？
鬍鬚曾尋日以創新革命為題發表最新網誌，起首七段都係講創業故事，但去到最後兩段疑意有所指，話就算創業者有夢想、有毅力、有決心、有好計劃等，最終都可能失敗收場。
佢話，因為創業本身有太多外在因素係唔能夠控制，創業者必須有承受挫敗嘅準備，仲要喺適當時間離場，減少生意上嘅損失。鬍鬚曾借題發揮都非首次，但觀乎各界人士多次叫佔領人士退場，佢哋至今都無動於衷，似乎要耐心再等一陣嘞！