民建聯蔣麗芸（Ann）同民主黨黃碧雲（一舊雲）一向以言論惹火見稱，最近二人就港人同內地人就讀研究生比率，由立法會駁火延伸至社交網站平台。阿Ann最新再向一舊雲開火，指對方應該建議院校炒咗一班剩係識得教唆學生違法嘅講師同副教授，將筆錢轉為資助本地大學生學費喎。
一舊雲同阿Ann嘅言論針鋒相對，源於立法會會議上周辯論有關「港人優先」嘅無約束力動議，阿Ann突然爆出一句，話如果每年唔係有大批內地尖子來港讀研究生，八大院校嘅研究院可能會執得七七八八。曾批評阿Ann嘅言論唔經大腦嘅一舊雲，喺社交網站強調香港嘅教育資源應該優先用喺港人身上，否則會血本無歸。
阿Ann其後喺社交網站撰文反擊，批評一舊雲如果真係關心學生，就應該建議炒咗一班只係識得教唆學生犯法嘅講師同副教授。一舊雲同阿Ann喺社交網站已經鬧到面紅耳赤，唔知佢哋見到面會否面左左呢？