政情：立會保安嗌補水
佔領行動持續七十幾日，大批警察日日加班叫苦連天，同病相憐嘅仲有一批立法會保安，事關部分佔領人士於立法會大樓外駐紮，加上大樓一度成為示威者衝擊嘅目標。據聞一批立會保安自佔領行動九月底爆發後，平均每人每日都要加班兩小時，但佢哋無得「補水」，只能不斷累積補假，基本上個個保安都累積咗十幾日補假，惟寄望聖誕、新年等長假期可以盡量清假，否則唔知等到何時先可以有得放假。有人建議不如「兩條腿走路」，即既可補假，亦可將假期變「補水」，唔知曾親自留守大樓嘅立法會秘書長陳維安會否考慮吓呢？
盼彈性處理 各取所需
據聞立法會保安有固定人手編制，防止立法會被衝擊，因此立會保安人人都要加班，平均都累積十幾日補假，高峰期更有人累計超過二十日，長此下去隨時「積爆假」，有人因而提出「補水」機制，畀各方最大彈性解決問題。
同一時間，立會一眾秘書處文職人員都因佔領行動而不停加班，唔少秘書處職員都想自行選擇「補水」定補假。不過目前立法會只有補假、無「補水」機制，要改變目前做法，就要睇立法會行政管理委員會（行管會）會否決定特事特辦。
有議助頻帶女友人過夜
講開行管會，聽聞今日除咗討論應否以立法會名義申請禁制令外，仲會討論其他議員違規事項，事關行管會早前推出三招新措施限訪客逗留。之不過有議員仲當耳邊風，例如工黨張超雄，佢近日先後兩次帶領佔領人士入立法會沖涼，咁都未算，聽聞有一名議員助理仲離譜，頻頻帶女友人上立法會「過夜」。據知以上兩件事都「斷正」，惟當場無人聽從保安勸喻，立法會主席曾鈺成最終決定介入事件，睇怕行管會都要有心理準備開個較長會議，一併解決以上嘅奇難雜症嘞。