政情：中環出更：林健鋒寸長毛「勤力又好客」
港台一個不時邀請政治新鮮人出席嘅節目，尋日舉行十周年升級典禮，邀請咗跨黨派合共九名立法會議員同政黨代表到場，同時叫佢哋將自己覺得有意義嘅物件放入時間囊，等十年後再次打開。適逢議會近年不時出現拉布戰，身兼行政會議成員嘅商界議員林健鋒（Jeffrey）選擇將塊布同把鉸剪放入時間囊，以剪布對抗部分激進派議員拉布。
「拉布元兇」常招呼人入立會瞓
Jeffrey其後更當面揶揄同場現身嘅社民連梁國雄（長毛），口講長毛「既勤力又好客」，之不過「勤力」係為咗拉布，形容對方為「拉布元兇」；至於「好客」所指嘅係長毛最近經常招呼唔少佔領人士去立法會瞓覺。長毛罕有地無即刻反擊，只係好老實咁講咗一句，「我都唔知佢（Jeffrey）嚟」，又話如果知道一定會叫對方車埋自己，似乎有啲無厘頭喎。
麥美娟將「人大決定」放時間囊
同場出現嘅泛民主派中人，紛紛將同佔領行動相關嘅物件放入時間囊，其中即將同男友結婚嘅人民力量主席袁彌明（Erica）就將一個少女公仔放入時間囊，寓意今次行動唔似以前由政黨帶頭，而係由一班讀緊書嘅青年人發起。至於工聯會議員麥美娟就係眾女將中，唯一一個將人大常委會八月底政改決定文件放入時間囊，再三強調爭取民主，都唔應該違背人大決定。
卓妮