國之將亡，必有妖孽。今日香港無奇不有，社會紛紛擾擾，校園風風雨雨，連電子遊戲都烏煙瘴氣，公然以色情及暴力做招徠，簡直係荼毒青少年，誤人子弟。
係咁嘅，近排市面有多款標榜高清次世代遊戲機推出，遊戲生產商食住上，推出立體仿真畫面電子遊戲，其中一款仲可以親身「召妓」，色情暴力兼而有之，遊戲迷趨之若鶩，先試為快，包括唔少未成年少年。可以見到，遊戲裏面除咗有裸露及性交畫面，主角仲可以過「手癮」，「車震」都可以，而且現場感超強，連呻吟聲都有埋添，幾乎同「打真軍」冇分別，問你服未。
仲有吖，呢款遊戲除咗賣弄色情，同時亦渲染暴力，主角「召妓」之後，可以殺妓、搶肉金或者將對方踢落車。唔怪得家陣有啲青少年崇尚暴力喇，睇嚟同不良電子遊戲有關o架。
正如有前淫審處審裁委員話齋，呢款遊戲已經屬於禁止十八歲以下兒童接觸嘅第二類（不雅）物品。唔講唔知，原來目前本港對電子遊戲無王管，既冇分級，亦冇法例規管，青少年接觸呢類不良資訊話都冇咁易。有立法會議員質疑當局遲遲未立法規管暴力同色情遊戲，係荼毒青少年，要求修改法律，仲要售前評級，並嚴格巡查。
冇錯嘞，當局對呢啲暴力同色情遊戲視若無睹，擺明就係失職喇。係呢，影視處同淫審處究竟點樣做嘢o架？佢哋任由不良遊戲荼毒青少年，仲唔係誤人子弟？
講到誤人子弟，又點止呢啲遊戲吖。家陣香港烏煙瘴氣，七國咁亂，就算青少年唔打機，一樣會被荼毒嘅咋。呢，淫賤傳媒同無良政客妖言惑眾，顛倒是非，青少年長期被洗腦咯喎，想唔偏激都幾難。就講佔中鬧劇吖，教法律嘅老師知法犯法不特止，仲教唆學生犯法，而法律界出身嘅政客仲話「不守法絕非等同不尊重法治」添；有幼稚園教師甚至向小童灌輸「警察係壞人」嘅觀念，你話係咪離晒大譜吖。
正所謂，臭罌出臭草，劣師出惡徒。青少年成為佔領鬧劇嘅主力軍，而且愈來愈激進，歪理當真理，犯法當平常，衝擊警察當英雄，呢啲咪就係香港教育培養出來嘅「成果」囉。港府最近如夢初醒，話要改善青少年工作喎。其實計功夫茶話齋，青少年工作固然要加強，但最緊要係正本清源，還青少年一個乾淨嘅環境，除咗立法規管電子遊戲，幫年輕人遠離不良資訊，仲要將嗰啲誤人子弟嘅教育界敗類逐出校園，咁就一天都光晒喇！