鄉議局即將踏入選舉年，明年初起一連舉辦村代表、鄉事委員會及鄉議局選舉，間接影響埋直落嘅區議會選舉，可謂各大選舉前哨戰。過去鄉議局同民建聯（民記）喺選舉上，一直係密不可分嘅好拍檔，但近年雙方關係已經大不如前。據知兼任民記西貢將軍澳支部副主席嘅西貢鄉事委員會副主席邱全，近日更決定退黨保平安，以免影響村代表以至鄉委會選情。
事緣經歷多次選舉後，新界人開始不滿民記「有事鍾無艷」，淨係識搵新界人過橋，選票、着數攞到盡，但幾乎冇回報，鮮有為新界人發聲；加上早前「反佔中」，鄉紳淪為民記布景板，辣慶唔少鄉紳。所以身兼民記身份嘅鄉紳自然首當其衝，除平時受閒言閒語外，選舉期間幫民記助選就更加被指「手指拗出唔拗入」。
我哋問過邱全，佢承認的確係退咗黨，而且同村代表選舉有「少少」關係，但佢強調村民冇畀壓力佢，只係有感多年來對民記冇乜貢獻，無謂嘥咗個位喎。睇嚟邱全退黨只係鄉事派退出民記嘅序幕，日後定必好戲連場。