政情：橄欖九東交棒 陳曼琪「佔」先機
做咗立法會議員十幾年嘅民建聯陳鑑林（橄欖），預計做多兩年就退休，佢嘅九龍東議席由邊個接任仍然係未知之數。據講目前該黨有幾個人選，包括觀塘區議員柯創盛及洪錦鉉、黃大仙區議員陳曼琪及黎榮浩，大家都磨拳擦掌爭出線。不過，近日佔領行動成為社會熱門議題，而代表潮聯小巴公司申請旺角禁制令嘅律師陳曼琪忽然人氣急升，分分鐘有機會跑出接替橄欖個議席。
受建制派叔父輩垂青
佔領行動爆發後，陳曼琪代表潮聯小巴公司向法庭入稟申請旺角禁制令，要求重開旺角彌敦道一帶馬路，之後仲代表小巴公司聯同執達主任去旺角宣讀禁制令內容，又同學聯常委梁麗幗爭拗禁制令內容，令佢成為建制派嘅風頭躉。據聞建制派中人對陳曼琪嘅表現大為欣賞，覺得佢除咗唔怕班聲大夾惡嘅佔領人士外，解釋禁制令內容時亦都有理有節，認為佢喺旺角清場行動上應記一功。
正因為得到建制派叔父輩垂青，陳曼琪下屆接替橄欖出選九龍東嘅行情暫時被看高一線。不過，政治一日都嫌長，距離下屆選舉仲兩年，期間發生咩事都無人知，佢係咪保持到人氣，咁就要拭目以待喇。