中環出更：梁美芬「鼠計」向陳菊偷師
台灣「九合一選舉」今日舉行，香港多個政黨成員陸續組團赴台取經。立法會議員梁美芬周三已率先拉隊抵台，計劃五日內行勻高雄、台南、台中及台北取經，首站先拜會民進黨高雄巿市長候選人陳菊嘅競選總部。梁美芬仲乘機向陳菊嘅競選宣傳策略偷師，想話設計番套「鼠王芬」精品當選舉宣傳，認真睇得開。
「花媽」陳菊去年因為其圓潤身形配一頭捲髮，造型似足日本卡通角色「花媽」（香港譯名「花師奶」）而得名，陳菊嘅競選團隊亦順水推舟，設計一系列花媽造型嘅卡通精品，更自設官方粉絲團，令陳菊紅上加紅。
梁美芬眼見陳菊利用精品殺出血路，不但即場買咗套「花媽」耳機孔防塵塞留念，有隨行團友更建議佢以其花名「鼠王芬」為噱頭，推出一系列「鼠王芬」精品，話唔定大受歡迎喎。其實網民早喺梁美芬參選一二年立法會選舉時已經幫佢設計咗唔少「惡搞」圖，相信佢唔使頭痕點樣設計喇。
卓妮