政情：吳傑莊當年創業被呃三百萬
金至尊數碼行政總裁吳傑莊（Johnny）前年成立「青年專業聯盟」（YPA），集合會計、金融服務、法律、資訊科技、建築、測量及都市規劃五個界別嘅力量，培育下一代進身專業之路。Johnny慨嘆，如果十年前有類似組織，當年佢北上創業時就唔會被人呃咗成三百萬元喇！
驅使設聯盟幫後生仔
YPA今年去廣州訪問，期間提出成立前海、南沙同香港三地嘅青年創業中心，當地政府認為呢個建議正面、可行，仲話希望盡快落實添！但講開創業就勾起Johnny嘅傷心事，話說佢當年投資三百萬元，諗住北上創業搞IT大展拳腳，點知遇人不淑。
Johnny憶述，當年佢嘅拍檔用好多名目陰乾佢嗰三百萬，例如收顧問費等，最後仲粒聲唔出走埋佬。不過，正正因為呢個經歷，令佢決心成立YPA，希望幫到人生路不熟嘅後生仔創業。