外號「頭箍小姐」嘅財經事務及庫務局常任秘書長（財經事務）區璟智下月底正式告別三十二年公務員生涯，並由商務及經濟發展局（工商及旅遊）常任秘書長黃灝玄接手。黃灝玄任內嘅老頂、商務及經濟發展局局長蘇錦樑（Greg蘇）處理多個議題皆為燙手山芋，黃灝玄今次過檔可算係甩難喇。
對比區璟智，黃灝玄接手商經局嘅過去三年可謂「難關重重」，好似被揭多筆糊塗帳嘅盛事基金、免費電視發牌風波，及被謔稱為「網絡廿三條」嘅《版權（修訂）條例草案》等極具爭議嘅議題都係黃灝玄負責，更要頻頻幫手孭鑊，認真吃力不討好。
其實區璟智今次退休牽連政府多個決策局大執位，黃灝玄調任後嘅空缺由旅遊事務專員容偉雄接手，港府駐北京辦事處主任朱曼鈴就會回港接任旅遊事務專員。即係話容偉雄同朱曼鈴就要接咗黃灝玄留低嘅燙手山芋。至於朱曼鈴個位，就由民政事務局副秘書長傅小慧接棒，未來一段時間要到北京生活。