社會就民主選舉係咪有國際標準爭拗不斷，但估唔到婦女產假係咪有國際標準，都喺立法會爭論一番。話說尋日議員陳婉嫻（嫻姐）就婦女產假等婦女權利問題喺大會上提出質詢，勞工及福利局局長張建宗（小肥張）話，雖然《國際勞工公約》建議嘅產假係十四周，但本港產假薪酬係工資嘅五分之四，係高過「國際標準」嘅三分之二工資喎。
嫻姐發言時話，根據「國際標準」嘅產假應該係十四周，但香港嘅產假只有十周，質疑香港係低於「國際標準」。而嫻姐嘅黨友麥美娟亦質疑，部分國家嘅產假薪酬係全薪，但香港就只係薪酬嘅五分之四，情況並唔理想。
小肥張就反駁話，香港產假最初係無薪，達到國際標準後都冇停下腳步，證明當局係會睇情況嘅。
不過，如果單以薪酬計算，按「國際標準」放十四周產假、領取三分之二工資，同放十周產假、領取五分之四工資相比，似乎都係「國際標準」着數啲喎。