政情：立會蟹貨 翻生待沽

恒指回升 今檢討

立法會投資顧問小組成員、保險界議員陳健波就解釋，雖然帳面上睇到立法會揸住成手「蟹貨」，但由於當時三月尾恒生指數只得二萬二千點，依家恒指升到超過二萬四千點，估計帳面都有斬獲，而顧問小組今日亦會開會檢討投資組合。不過，據講當初立法會已沽出一批股票獲利，而呢批「蟹貨」只係沽剩嘅部分，但點解要沽剩呢批股票呢？

雖然立法會投資咩股票係保密，但另一投資顧問小組成員梁君彥（Andrew）就話，大部分現金都攞晒去做定期，亦會不時按股市最新情況買入唔少股票，希望可以賺番少少幫補吓。由於立法會一分一毫都係由納稅人埋單，所以投資時要好小心，盡量揀啲利息豐厚同有穩定增長嘅藍籌股。講到揀股，相信金融服務界議員張華峰都提供唔少意見。

不過，由於立法會身份敏感，Andrew話唔可以買入一系列同立法會職能有利益衝突嘅股票，例如港鐵（66）同領匯（823）等，要轉買其他銀行及公用股。由於部分議員身兼銀行非執行董事，佢哋喺建議顧問小組買入或者賣出某一隻股票時都要先申報利益，但小組就唔會因為個別議員身份而決定買唔買某隻股票喎。

錄逾三百萬盈餘

至於立法會上個財政年度嘅收益，獲得六億八千萬元撥款，較去年度多出三千七百多萬元。陳健波話，由於立法會今個年度開新位要使多成二千多萬元，再加上職員加薪，令佢哋要向政府申請更多撥款。不過，相比起一二／一三年度錄得超過一千三百萬元赤字，今年有超過三百八十四萬盈餘，成績算係唔錯喇。