中環出更：促屋苑收玻璃 區詠芷無撻朵
有「環保女神」之稱嘅環境局政治助理區詠芷（Michelle），經常都會以身作則推行環保生活。例如政府大力推廣玻璃樽回收，Michelle都儲咗唔少玻璃樽喺屋企，但點知佢個屋苑無玻璃回收箱，所以佢就去信屋苑管理公司加設玻璃回收箱，管理公司亦從善如流咁接納佢嘅要求。
不過，Michelle強調過程中絕對無撻朵，只係以住戶身份提出要求喎。經過商務及經濟發展局局長蘇錦樑嘅「卡片風波」後，似乎政助都學精咗喎。
環局推「咪嘥嘢」App
講開推動環保，環境局創作嘅「大嘥鬼」公仔形象深入民心，早前亦研發咗一個叫「咪嘥嘢」嘅手機應用程式，可以按使用者所在位置提示附近各個回收站位置，鼓勵市民回收各類廢物。Michelle話，手機應用程式內仲有一系列以「大嘥鬼」為主角嘅小遊戲，等市民喺玩遊戲嘅同時，可以增加對環保嘅認識。
卓妮