中環出更：許冠文助籌款 金刀梁請飲「酒」
冷面笑匠許冠文（Michael）近年已好少再開金口，但日前就特別幫香港愛滋病基金會慈善晚宴「棟篤笑」籌款，引來笑聲連場。請得郁Michael「出山」嘅，全靠基金會主席「金刀梁」梁智鴻「發功」。為答謝老友幫手，金刀梁回敬厚禮，笑言Michael將來萬一感染愛滋病，願意免費送上每杯價值萬多元嘅「何氏雞尾酒（療法）」，醫足佢一世喎。
好耐無表演，Michael搞笑本色依舊，揮灑自如，自嘲對愛滋病一竅不通，但有感社會對此病忌諱多多，有必要挺身宣揚一下。
楊大偉買枱指定食素
金刀梁搵笑匠站台，只因愛滋病問題喺全球依然嚴峻，每十二秒就有一個新症誕生，防治工夫刻不容緩。基金會副主席林李婉冰（Nina）都好認同，所以拍心口擔大旗做晚宴籌委會主席，搵到酒家以優惠價贊助「富豪宴」。
東華三院前主席李三元、總理馮少雲、太子珠寶鐘錶主席鄧鉅明及Green Monday創辦人楊大偉（David）當晚齊買枱支持。不過，David指定佢嗰圍要食素，聽落畀十幾萬買圍枱食素，好似唔多抵，但佢笑言志不在食番夠本，而係「做得我嘅朋友，當然要Go Green！」
中國愛滋病防治行動香港委員會副主席李麗娟，都同細妹李桂蘭合共捐出兩萬多元首飾供大會抽獎。
金刀梁太太馮令儀當晚戴上自製紅珠仔心口針捧場，果然鴻運當頭中頭獎，捧走價值萬多元嘅鑽石頸鏈，認真幸運。
卓妮