日子難過年年過，眨眼聖誕又嚟到。喺佔領陰影籠罩之下，港人將會點樣迎接呢個節日？聖誕本應係普天同慶嘅日子，可惜依家七國咁亂，睇怕普天同慶就冇嘞，「普天同慶」就有！
呢，一項針對聖誕及元旦消費預測嘅調查發現，市民消費態度審慎，四成二受訪者預期明年經濟差過今年，較舊年嘅兩成八大幅增加十四個百分點，表示會減少消費嘅比例亦由舊年嘅一成七上升至兩成二；認為今年聖誕唔開心嘅受訪者佔一成八，創過去五年新高，年紀愈大對經濟前景愈悲觀。
正所謂，一葉知秋，呢個調查結果足以反映前景不妙。咁又係嘅，佔領行動變質變味，對經濟民生影響愈來愈大，市民睇唔通前景咯喎，消費自然審慎喇。本來，過去一年經濟表現唔算太差，一路都有增長，可惜受到政治因素影響，社會動盪不安，爭拗多過和諧，破壞多於建設，加上外圍經濟唔穩，美國又即將加息，內憂外患齊齊夾擊，市民對前景又點會有信心吖。
唔係危言聳聽o架，佔領行動死唔斷氣，市面遍吹淡風，營商環境惡化，尤其係佔領區附近嘅商戶更加係慘淡經營，部分商戶生意額跌咗九成，問你點頂。最離譜嘅係，嗰個唯恐天下不亂嘅政棍李卓人仲要求企業明年加薪百分之七，簡直不知所謂，佢有納稅人供養，又有淫賤黎及外部勢力提供黑金，梗係可以講風涼話喇，難為商戶苦苦掙扎，今日唔知明日事，莫講話加薪百分之七，究竟可唔可以捱過目前呢一關都成問題。
話時話，覆巢之下，豈有完卵，佔領行動影響廣泛，各行各業都難以獨善其身，受害嘅又點止小商戶吖。有國際機構日前發表報告指出，香港亞洲金融中心地位可能被上海及深圳取而代之，呢個先至係香港嘅最大噩夢。大家都知道，香港近來一味食老本，優勢漸漸消失，金融業係所餘無幾嘅支柱之一，如果連呢項優勢都被內地城市後來居上，咁就隨時都可以收檔嘅喇。有人預測香港遲早淪為中國二線城市，睇嚟仲係樂觀咗啲，最怕香港連二線城市都冇資格做咋。
正如有人話齋，一個地方嘅興衰有迹可尋。香港一向係福地，風調雨順，政通人和，人人安居樂業；點知依家淪為九反之地，紛紛擾擾，爭拗不絕，試問又點可能有運行吖？呢場佔領鬧劇隨時成為香港嘅喪鐘，一啲都冇誇張。呢嗱，尋日旺角清場又搞到嘈喧巴閉，衝突不斷，再咁落去，香港遲早被佢哋玩死o架咋！