政情：中環出更：鍾國斌倡佗槍警守立會
立法會議員鍾國斌（Felix）及莫乃光上星期應英國英聯邦議會協會邀請，到倫敦參加國際議會會議，咁啱避過上星期立法會被蒙面嘅示威者衝擊事件，Felix話，留意到英國議會入面嘅警察都係荷槍實彈，對比手無寸鐵嘅立法會保安，香港可以參考吓人哋做法喎！
參考英國做法
立法會繼六月因審議新界東北發展前期撥款而首次受衝擊後，上星期又有一班示威者用鐵馬同磚頭撞爛立法會嘅玻璃，當晚立法會內只有幾名保安員，手無寸鐵嘅佢哋只能眼白白睇住示威者亂衝亂撞，都咪話唔驚！
相比之下，英國議會嘅保安就嚴謹好多。Felix話，英國街道上嘅警察都冇佗槍，反而議會入面嘅警察就荷槍實彈，同香港啱啱相反。佢話，立法會可以參考吓英國，派啲佗槍警員駐守立會。話時話，英國係全球面對恐襲風險最高的國家之一，保安要求梗係唔同喇！
原來Felix咁啱避過兩次衝擊立法會，六月佢去緬甸參觀工廠，上周就去咗倫敦，咁算唔算好彩呢？
卓妮