政情：中環出更：精神大使長跑減壓
好多人話現時社會機會少咗，年輕一代為上車、為前途，壓力好大。尋日新一屆「香港精神大使」公布結果並舉行委任禮，包括社企「Green Monday」創辦人魏華星（Francis）及謝瑞麟珠寶副主席黃岳永（Erwin）等六人獲委任為大使。Erwin話，好多人將置業及事業睇得太重，其實好多國家嘅人未必好早就擁有物業，買樓唔代表一切，好似家庭關係一樣係心靈滿足嘅重要因素。
講起港人壓力大，Francis分享佢減壓嘅方法就係跑馬拉松，就算佢隻腳受咗傷，都依然無間斷練習。Francis話，運動除咗令人更精神同正面思考之外，仲可以幫助了解更多身邊嘅人。好似佢參加一個城中知名慈善遠足活動，參加者要同隊友喺四十八小時日夜趕路，行足一百公里。Francis笑笑口話，通常經過一夜冇瞓過覺之後，大家嘅真性情同壞脾氣就會原形畢露，所以運動亦可磨練個人意志，同埋考驗朋友之間的關係。佢同太太就因為一齊參加過兩次後，就決定拉埋天窗喇！
香港精神主席盛智文及活動召集人呂慶耀（Bryant）都有到場，仲有城大校董會主席胡曉明，事關係佢推薦Francis成為新一屆大使。
早睡早起做運動
身為建築師嘅Bryant工作繁忙，但佢都認同運動同休息係最好減壓方法，所以近半年佢開始堅持每朝六點起身跑步或游水。咁早起身？Bryant教路，幾點起身唔緊要，因為幾點瞓覺先係重點，想要精神奕奕，一定要早一晚預備好喎！
卓妮