佔領運動發展到依家已經變質變味，佔領區內鼠輩橫行，真係睇見都眼冤。功夫茶講緊嘅唔係出錢出力又同黑幫有瓜葛嘅幕後黑手淫賤黎，而係真正嘅老鼠。佢哋同淫賤黎一樣，喺佔領區內稱王稱霸打橫行，直頭神憎鬼厭。
嗱，尋日凌晨之嘛，旺角佔領區內又有一隻老鼠從天而降，一名女佔領者當堂嚇到花容失色。點解佔領區咁吸引老鼠？鬼咩，佔領拖咗近兩個月，留守者製造嘅垃圾同食物殘渣堆到四圍係，搞到烏煙瘴氣，臭氣熏天，梗係吸引蛇蟲鼠蟻嚟開派對啦。
旺角佔領區藏污納垢，其他兩個佔領區亦唔好得去邊。特別係金鐘，本報早前獨家報道佔鐘區內嘅立法會大樓蟲鼠橫行，有啲仲好似貓咁大隻添。咁都唔止，區內日前發現雀屍後遲遲無人清理，亦有人被蚊叮到周身傷。家陣登革熱、冬季流感及腸病毒等多疫拍門，仲有世紀瘟疫伊波拉陰魂不散，佔領區邋遢成咁，遲早爆大鑊嘅咋。唔係嚇大家，佔領區家陣由留守者揸弗，唔經佢哋放行，玉皇大帝都冇面畀，萬一爆發疫情，衞生部門隨時不得其門而入，到時疫症遍地開花，全港七百萬人實聽陪葬都得嘞。
話時話，之前有啲人懶浪漫懶感性，將佔領區描繪到好似互助互愛嘅人間烏托邦咁款，查實邊有呢回事吖。呢，佔領人士咪喺月初發起所謂「公民清潔日」嘅，點知一個二個好似搭港鐵見到長者上車咁，扮瞓覺詐睇唔到，你話嘞，佔領區有咩法子唔變垃圾崗吖。
講真，佔領區早就淪為三不管嘅九反之地，偷呃拐騙、非禮擄掠樣樣齊，垃圾蟲只係小兒科咋。有人將帳篷變「炮篷」，喺裏面打野戰；有人非禮男童；偷錢偷水偷電早就見怪不怪，尋日居然發展到偷超市同機場快綫嘅手推車，簡直係沒有最污穢，只有更污穢。功夫茶想請教吓呢班民主鬥士，唔係話「莫忘初衷」、「愛與和平」嘅咩，唔通搞細路偷嘢就係你哋嘅初衷，唔通「愛與和平」嘅「愛」係「性愛」個「愛」？唔通「和平」就係同鼠輩蚊蟲「和平」共處，一齊橫行霸道？
古人就講得啱嘞︰得道多助，失道寡助。尋日又有新民調發表嘞，超過八成受訪者認為示威者應盡快撤離，認為應該留守嘅剩低百分之六咁大把。你哋咁鍾意講民主吖嘛，民主就係少數服從多數，仲兩頭望做咩呀，快啲執包袱返屋企啦。
一句講晒，佔領鬧劇影響經濟、破壞法治、傳播病菌，有破壞冇建設，一日唔清除呢個腫瘤，香港都唔會有運行o架！