政情：冇買日本樓 陳湛全呼好彩
近期日圓大跌，吸引唔少港人到日本投資物業收租，但地震及天災始終係最大考慮。荃灣區議會主席陳耀星之子、香港馬主協會會長陳湛全（Charles）就話，原來佢都諗過喺日本買樓，仲飛埋過東京嗰邊睇盤添，但好彩最後都冇買到。
親身飛去視察
Charles話，一向都有喺外地好似加拿大等地置業投資，大約兩年前有朋友喺日本投資咗幾個物業，仲叫佢諗吓投資。當時佢都真係心郁郁想試吓，去年仲親身飛咗去東京六本木睇樓添！佢話，當地樓價比較相宜，但最後因為考慮到天災嘅風險太大及輻射等問題，權衡風險後都係放棄。
佢話，依家唔好講話地震，日圓匯價瘋狂下跌，就算樓價上升都補唔番喎，慶幸當時冇買到，如果唔係蝕到肉都痛埋。
不過，雖然佢話住宅買唔過，但認為店舖就仲可以再諗諗，而佢不時都會去日本工作或旅遊，似乎地震同埋輻射並未有影響到佢去日本消費嘅意欲喎。