政情：選區五變九 胎死腹中

18至22歲選民增數萬

現時立法會直選分為五大選區，例如新界東、新界西就各自選出九名議員，但呢個做法令激進派憑些少票源就足以當選，呢點係最令政府擔心，所以先傳出有九區方案，即將全港劃成九大選區。不過，世事難料，一場佔領行動唔單止令泛民內部重新洗牌，衍生出一隊龐大嘅年輕生力軍，最近一次選民登記活動，單係十八至廿二歲選民增長已有幾萬人，從此可以見到年輕選民嘅增長趨勢有幾驚人。

呢群年輕生力軍唔係主流泛民票源，亦唔一定係社民連、人民力量嘅支持者，而係真真正正嘅學生支持者，如果政府將五區變九區，呢群生力軍幾乎肯定只將選票投畀學生代表，或是代表學生嘅激進派人士，屆時九區分分鐘有六、七區有人當選，政府就好頭痛嘞。

泛民大黨票源勢被搶

另一方面，話說當初政府向政黨「摸底」時，有泛民大黨都認同九區方案，因為可以令佢哋區區穩佔一席。但佔領行動過後，整個泛民陣營基本票源唔同晒，泛民大黨嘅票源隨時被激進派進一步蠶食，依照呢個走勢，來屆選舉泛民選情絕不樂觀。從政府角度諗，當然想同傳統泛民交手，都好過同激進派交手，所以政府內部都認為九區方案唔太可行，憂慮令激進派有機會抬頭。

如果「五變九」唔可行，咁「五變七」又點呢？有政壇中人話，五區變七區的確比較好，可惜現屆政府已經花大量時間同精力處理佔領行動，仲有無心力去做選區劃界，絕對係一大疑問。話雖如此，政府仍然會喺下月底諮詢公眾，但如果大部分意見都唔認為需要重新劃區，相信政制及內地事務局局長譚志源都會順應民意嘅。