中環出更：龍和道「民調」六成被捕者想移民

警方上月中喺金鐘龍和道清場時，被部分佔領人士同聲援市民投訴過分使用武力。香港社會工作者總工會（社總）尋日就喺金鐘佔領區公布當日向涉嫌衝擊龍和道被捕人士嘅民意調查，結果指大部分受訪者批評警方濫用暴力，又話事發後面對極大心理陰影，部分人更話想離開香港添，聽落真係得啖笑。

社總喺龍和道清場後訪問咗二十五位被捕人士，當中超過九成批評警方不恰當使用武力，十四位受訪者投訴曾經被警方毆打。四成受訪者話至今仍不時諗起事件，有人更不時發噩夢同失眠，令情緒大受困擾。而超過一半受訪者對香港未來失去希望，更有多達六成受訪者話想移民離開香港添。

佔領人士口口聲聲話佔領道路係要幫香港爭取民主，但違法始終係違法，加上持續近兩個月嘅佔領行動影響深遠，但佢哋依家竟然話要離開香港，究竟係真心為香港未來着想，定係想攪亂香港後「鬆人」呢？不過，佔領人士會否在佔領行動結束後被檢控、甚至留案底都未知，所以攞唔攞到香港「良民證」申請移民都成問題呀！

卓妮