中環出更：行上獅子山 精神可讚

今次行山活動有三千人參加，起步禮雲集各界名人，政界就有立法會議員黃國健、梁美芬、觀塘區議會主席陳振彬、青年協進會主席林亨利，商界有福建幫嘅全國工商聯副主席盧文端、「小巴大王」馬亞木同兒子馬僑生、仲有剛榮升爸爸嘅蔡加讚！政府都好畀面，派出政制及內地事務局副局長劉江華捧場。

唔好以為行山係後生仔專利，馬僑生同卓妮講，佢八十三歲高齡嘅爸爸間唔中都會行山，而盧文端就話，自己每星期都會去山頂附近行一次，反而仔女就太忙唔得閒陪佢。雖然嘉賓們講到自己行得走得，但卓妮去到獅子山終點時，竟然見唔到佢哋蹤影，只係見到兩人，一個係蔡加讚，另一位就係林亨利。

多位政商界名人出席行山活動，包括王惠貞（左起）、盧文端、陳振彬、黃國健等。

「小巴大王」馬亞木（左）同兒子馬僑生（右）齊齊出席支持行山活動。

冇拉筋 怕扭親

不過，林亨利係坐聖約翰救傷隊專車上山，起初以為佢行山中途受傷啦，原來因為佢係聖約翰救傷隊總監督。所以行上山只見蔡加讚一人，佢話其實都好怕扭親，因為向來好少行山，加上又無拉筋，好彩尋日狀態唔錯，可以完成所有路程。其他人起步完就走，唔通其他嘉賓諗住體現獅子山「下」精神，所以留喺山腳？

卓妮