香港近年好似撞邪咁，諸事不順，重大基建阻滯多多，因為爭議而造成延誤及嚴重超支嘅項目更加係數不勝數。嗱，話口未完又有一單，睇嚟納稅人又要埋單咯！
係咁嘅，港鐵沙中線土瓜灣站工程挖到大面積宋、元遺迹，據講係近年本港最大考古發現添。經過長時間討論，最近保育方案終於出台，已發現嘅主要遺迹大部分原址保留，但有一個古井因位處車站中央，引起唔少爭議。
發展局局長陳茂波話喎，呢個古井本身唔齊整，保育價值未必高，可考慮同其他古物一齊重置喺宋皇臺公園。否則，如果原址保留，額外開支可達十三億元，而且工程要延誤多四個月。根據當局估計，連同保護古蹟，沙中線工程超支可能高達五十四億元，延誤至少十五個月，如果保育方案遲遲未定，每遲一個月工程開支就會多二億五千萬元。
其實，真正數字可能仲唔止咁多o架，你知喇，港產官僚計數一向唔準，加上保育爭議又唔知拖到幾時，超支隨時達天文數字都唔出奇。嗱，立法會議員嘅睇法已經南轅北轍喇。有人話原址保留成本太高，易地重置可以慳一大筆，仲可以追番工程進度。有人就唱反調，指古井唔係普通文物喎。
話時話吖，家陣凡係涉及保育、環保嘅項目，一定有爭拗，公說公有理，婆說婆有理。如果一遇反對就縮沙甚至跪低，咁就乜都做唔成嘅喇。老實講，歷史遺迹如何取捨，既要考慮歷史同藝術價值，亦要顧及發展需要，易地重置往往可以兩者兼顧，值得考慮o架。
好似宋皇臺公園咁，最出名嗰塊巨石，係由原先嗰塊削出來嘅，位置亦唔喺原先嗰度，但一啲都冇影響呢塊石嘅歷史價值。仲有歷史建築物「美利樓」，屹立中環一個半世紀，九○年代先搬遷至赤柱，咪就係易地重置嘅成功例子囉。
可惜吖，香港社會愈來愈政治化，司法覆核更淪為政客阻礙大型基建嘅撒手鐧，易地重置勢必阻力重重。好似當年港珠澳大橋環評報告咁，因為有東涌居民提出司法覆核，工程嚴重延誤，成本大幅飆升；仲有機場第三跑道工程，政客威脅重施故技，都唔知幾時至可以開工。大型基建多災多難，小型工程一樣運滯。大埔龍尾人工泳灘計劃環評報告同工程撥款都冇問題，點知開工前殺出個程咬金，環保團體提出司法覆核，又搞咗一大輪。
功夫茶都係嗰句，社會要向前行，環保同發展必須取得平衡，如果偏廢一邊，香港呢個國際金融中心分分鐘打回原形，變番小漁村都唔出奇o架。