回歸以來香港政事不堪提，不要說示威、佔領等運動無日無之，行政、立法互不咬弦，香港──從一個經濟城市變為政治城市，社會動盪、貧窮人口有增無減，「窮忙族」青年看不到明天會更好，只看到呢世都會窮。
此外，政府吹水至叻，房屋問題解決唔到，全民退保又係空中樓閣，人口老化社會配套完全跟唔上：長者健康中心工作嚴重積壓、近六千長者等宿位等到死……老朽不禁要問一句：高薪尊貴嘅高官，到底為香港作出過甚麼貢獻？點解經濟轉型永遠只是紙上談兵？點解政府咁多民生實事擺响度唔去做而經常滋擾打壓正義傳媒？
一個政府之所以難有作為，見微知著也！好似郵政涉嫌違法滋擾東方報業集團事件，調查咗超過兩星期，立法會議員提出書面質詢，香港郵政對被開啟嘅郵件，又兩個月才退件，種種迹象無不違背了正常的程序，這種錯，老朽無以名之，只能推測或許是「道德上不正當」！
「廢官枉自講廢話」，有關當局不肯或不敢面對「真相」，那只會令人覺得政府鬼祟，係錯咗，老老實實認衰、道歉！古人說：「令不再而民順從，刑不用而天下治」，其實，也不過是為政者的德行令百姓信服，此德者──老實而已，真誠道歉亦德也！成日搞咁多小動作，一時又話收到匿名郵件，一時又話收到投訴……而次次都係「假調查真滋擾」，如此政府點會有所作為？敵我不分、好醜不辨，咁已經係死罪喇！
一個政府嘅淪落，就好似「溫水煮蛙」咁，呢隻蛙，就係其身不正嘅政府，以為對正義傳媒小小搞作無傷大雅，得閒就逐個部門輪流上來「視察」玩吓啦，冇事嘅！誰知在溫水浸得耐，以為舒服到痹，到溫水一路加熱，再想跳出來就為時已晚了！政府之死，源於假調查真滋擾！