中環出更：發叔叫林偉強咪隨波逐流？
沙田鄉事委員會獲政府以象徵式租金，批出鄰近沙田火車站靚地建新會址，更邀請鄉議局主席劉皇發、副主席張學明及林偉強出席新會址動土儀式。發叔致詞時特別提起「佔中」，並引用宋代司馬光《資治通鑑》「人心不搖，邦本自固」，寄語原居民要安份、理性，唔應該隨波逐流、破壞基石。咁啱林偉強日前亦號召村民「佔領」北角政府合署門外，唔通發叔另有弦外之音，想訓示林偉強咪隨波逐流？
林帶隊「佔領」合署
林偉強日前為抗議政府將新界三村部分土地納入郊野公園範圍，號召村民去北角政府合署踩場靜坐，兼紮營通宵「佔領」合署門外。雖然林偉強話擺放帳篷只係用嚟儲存物資同擋風，唔認「佔領」政府合署，但佢喺敏感時刻隨處紮營，實在有自打嘴巴之嫌喎。講番動土儀式，沙田鄉委會主席莫錦貴致詞時亦賣口乖感謝鄉議局出面幫忙，所謂「大樹好遮蔭」，話冇鄉議局就冇呢塊靚地，果然夠晒安份、理性喎。
卓妮