中環出更：大小議員 激辯考試廢存
立法會議員經常開會辯論社會政策，但辯論政策唔係議員專利。六十九名「兒童議員」尋日就喺每年一度嘅兒童議會會議討論有關兒童教育政策，原本呢類議題較為沉悶，但出奇地竟然有十位立法會議員出席同參與討論，當中仲包括榮登「立法會大懶蟲」三甲之列、甚少出席立法會會議嘅「怪醫」醫學界議員梁家騮。莫非佢覺得喺兒童議會得到嘅滿足感大過喺立法會？
兒童議會會議由多個關注兒童權利團體舉辦，大會安排六十九位十二至十七歲嘅兒童議員，提出三項議案辯論，其中一項係有關提升兒童喺制訂教育政策時嘅參與度。有兒童議員提出政府擬定政策時應該聽取兒童意見，但就被反對動議嘅兒童議員反駁，如果學生唔想做功課同考試，學校係咪就要取消？
倡專題研習評核通識科
出席會議嘅教育界議員葉建源就話，成年人反對興建焚化爐都係因為自身利益受影響，反問兒童議員係咪都只顧自己利益而想廢除考試。不過，一直反對通識科要考試嘅議員梁美芬就話，通識科可考慮以專題研習取代考試，正所謂「讀萬卷書不如行萬里路」，學生可以多啲返內地交流。
點知有兒童議員就反駁話，香港都有好多去外國嘅交流計劃，要增廣見聞唔一定要返內地咁話。
議員劉慧卿就覺得，如果學生真係唔想考試，而大部分人都覺得考試係對兒童唔好嘅話，咁點解大人仲要執行呢？卿姐咁講，唔通佢細個時都唔鍾意考試，所以支持學生唔使考試？卿姐就話，雖然佢好耐冇讀書，但佢從來都唔怕考試。
卓妮