唔知係咪衰開有條路，佔領運動已經搞到香港七國咁亂，烏煙瘴氣，偏偏喺呢個時候，登革熱、流感、腸病毒三疫拍門，加上外國嘅伊波拉揮之不去，簡直係危機四伏。最得人驚嘅係，面對惡疫壓境，衞生官僚仲好似瞌緊眼瞓咁，毫無防備，搞到蚊患鼠患愈來愈嚴重，再咁落去，遲早爆大鑊嘅咋！
唔係功夫茶杞人憂天。最新審計報告揭發監察白紋伊蚊嘅誘蚊產卵器指數多甩漏兼唔到位，放置各區嘅蚊杯懷疑受干擾個案大增，舊年有一百零二宗，今年頭半年就有七十六宗，接近一○至一二年總和，有啲蚊杯橫放地上冇人理，有啲甚至亁晒。咁都唔止，食環署對上一次檢討蚊杯位置，已經係○七年嘅事，赤柱及銅鑼灣等住宅旅遊區都唔喺監察之列，你話嘞，由此得出嘅蚊患指數，又點可能反映到實情吖。
除咗防蚊不力，滅鼠一樣唔掂。好似西貢區咁吖，表面上過去兩年鼠患指數都係零，查實每年都接到幾百宗老鼠出沒投訴，證明呢啲指數完全信唔過。至於其他好似曱甴同烏蠅等常見害蟲，食環署更加係關人個關，從來唔會主動巡查，要等到有投訴至做嘢。
其實唔使審計署踢爆，係人都知無論係蚊患指數抑或鼠患指數，不嬲都係得啖笑。本報記者試過去蚊患指數最低嘅馬鞍山進行人肉測試，結果被叮到周身傷，旨意食環署滅蚊，真係死得人多。唔怪得最近錄得多宗本地登革熱感染個案，連食物及衞生局局長高永文都承認，登革熱有可能落地生根成為風土病啦。唔好唔記得，鄰近香港嘅廣東省最近登革熱大爆發，確診個案累計超過四萬宗，造成多人死亡，香港同廣東一河之隔，氣候條件相似，爆起上嚟後果不堪設想。
除咗登革熱殺到埋身，舊年肆虐內地嘅H7N9禽流感近日亦有死灰復燃嘅迹象，江蘇省最近錄得入秋以來首宗確診病例，依家天氣轉涼，又到流感高峰期，加上候鳥南遷，病毒隨時南下攻港。可惜吖，急驚風遇着慢郎中，當局防疫一味歎慢板，目前全港只有一成四人打咗流感疫苗，醫護人員接種率亦只有三成咁大把，遠低於其他國家嘅水平，根本起唔到預防社區爆發嘅作用。至於伊波拉病毒咯喎，全球嚴陣以待，唯獨港府滋油淡定，幾乎不設防咁滯，問你服未。
嗱，車公早就提醒港人，「禍去禍來因自招」。家陣香港七國咁亂，港府施政瀕臨癱瘓，情況仲衰過○三年沙士時期多多聲，當局繼續唔嗲唔吊，求其爆發一種疫情，隨時比當年更大鑊，唔係講笑o架！