繼民建聯（民記）立法會議員鍾樹根嘅社交網站Facebook（fb）帳戶無故被刪除後，原來另一位民記議員陳克勤嘅fb帳戶之前都被「封殺」。克勤話，佢早前被fb封鎖咗個人帳戶，仲要佢提供個人資料核實身份先畀佢開番。不過，克勤就唔想將身份證資料畀fb，所以就攞咗張同樣有照片及姓名嘅惠州市政協證件頂替，但fb最後都收貨，令佢唔使冇咗二千個「朋友」咁慘。
除咗樹根同克勤外，原來同樣都有多個fb帳戶嘅民記議員蔣麗芸（Ann）同葛珮帆（EQ）都曾被刪除fb帳戶。阿Ann話，佢被刪除嘅帳戶平時都好少用，所以都唔理喇。
不過，被fb刪除咗三個帳戶嘅EQ就決定唔再「啞忍」，去信質問fb，對帳戶被刪除感到不解，要求重開佢同黨友嘅帳戶。而民記亦計劃開記者會講述事件，甚至不排除到fb香港辦公室踩場。究竟係民記被fb打壓，定係另有原因呢？睇嚟要等fb解釋先知喇。