政情：胡亂試發電機搞臭立會
立法會議員梁國雄（長毛）嘅議員辦公室（議辦）去年發生火警，好彩大樓內嘅自動灑水系統將火撲熄，但就連累其他議員辦公室水浸。不過，民主黨（白鴿黨）議員胡志偉未有吸取事件教訓，前日竟然喺議辦開柴油發電機，釋出陣陣濃烈臭味，搞到其他人以為火警，仲驚動保安添！對於呢班消防安全意識薄弱嘅議員，秘書處尋日就出招，邀請議辦提名職員擔任消防保安主任，同秘書處協調消防安全事宜。
自從佔領行動開始以來，部分泛民議員唔止喺自己嘅立法會辦公室擺放佔領行動物資，甚至縱容參與佔領嘅示威者同義工喺議辦或霸佔會議室留宿，當正立法會係酒店及佔領行動「大本營」，有人擔心萬一發生火警，都唔知會否因為太多雜物或太多閒雜人等而走避不及造成死傷。所以前日胡志偉個議辦傳出濃烈臭味，搞到其他大樓內嘅人都誤以為火警。
疑機件故障
究竟胡志偉開部發電機搞咩花樣呢？原來部發電機係佢近日花二、三千元購買，打算喺搞活動時使用。但點都估唔到佢竟然夠膽喺議辦內試機，好衰唔衰懷疑機件故障而發出陣陣濃烈臭味，四散到其他議辦，令大家誤以為發生火警，仲驚動埋保安上樓巡視添。不過，胡志偉只係話會攞部發電機去維修，連道歉都無句。
防火意識低
其實長毛嘅議辦去年五月及今年三月都分別發生過火警及響警鐘事件，對於議員好似缺乏防火安全意識，秘書處去信邀請議辦提名一位職員擔任每個議辦嘅消防安全主任，同埋提名至少兩名職員擔任聯合議辦嘅消防安全主任，以負責同秘書處物業及保安組協調有關大樓嘅消防安全事宜。
今次秘書處嘅做法就好似學校叫「壞學生」做風紀一樣，但喺成年人嘅世界係咪有效，真係好難講，分分鐘無人參加令計劃爛尾都未定。如果班議員係注重消防安全，就唔會搞到立法會大樓烏煙瘴氣啦！