中環出更：長毛生腎石 出院獲「贈興」
社民連立法會議員梁國雄（長毛）前日因為腹痛送院，當大家都擔心佢病情之際，原來佢已經出咗院。因乜解究會痛到入廠？長毛前日聲稱膽痛，但實情係有腎石，之前都痛過幾次，今次因為排唔到出嚟咪搞到發炎囉。
長毛尋日喺會議廳現身，就引來泛民及建制派議員問候一番，大家都好關心佢嘅病情。一日就可以出院，長毛話因為唔使做手術，但佢都承認少飲水，所以醫生叫佢飲多啲水，等佢啲腎石自然排出，同埋食少啲肥膩嘢喎，兩星期後覆診再睇情況。至於佢最愛嘅煙酒，長毛就表明同腎石無關，唔會減量喎。
議辦被貼「賣國賊」海報
雖然長毛大步檻過，但有人趁佢一出院就「贈興」。佢位於沙田大圍新翠邨新月樓地下嘅議員辦事處，尋日朝早被人貼上約三十張「漢奸、走狗、賣國賊」海報。職員報警求助，警方暫列刑事毀壞案跟進。據職員講，辦事處已經第三次畀人惡意毀壞，之前兩次警方仲未拉到人。
卓妮