港產官僚成日畀人話福利一流，服務九流，真係一啲都冇講錯o架，民航處就係最典型嘅例子嘞。
係咁嘅，本報舊年連環踢爆耗資近二十億元嘅民航處新總部超豪裝修濫用公帑、新空管系統閒置浪費等多宗罪，全城震驚。之後審計署跟進調查，證明本報報道珍珠都冇咁真。呢，審計報告係咁講嘅，新總部嘅好多豪華設施都係未經批准擅自興建，仲要係搞特殊化專畀高層享用嗰隻添。好似原本用作教育徑觀景廊嘅地方，處方自把自為改為會議及康樂多用途室，裏面大電視、卡拉OK房、舞蹈室以及藍光影音設備一應俱全，沒有最奢侈，只有更奢侈。話就話基層員工都用得，實際上淪為高層專享嘅私人休閒設施，民航官僚咁識歎，真係唔到你唔服。
講到識歎咯喎，當然唔能夠唔提前民航處處長羅崇文啦。佢喺辦公室僭建二百平方呎大浴室，當正自己係古時羅馬皇帝。至於大樓內價值六千幾萬嘅保安及電子系統，同樣係先斬後奏，買完再圍威喂分畀自己友。總之一句講晒，公帑落入民航處嘅手，用咗去邊，點樣用法，根本冇人管到，同跌落黑洞冇咩分別嘅咋。
嗱，民航官僚大花筒就話叻啫，但講到做正經嘢咯喎，就真係完全唔掂嘞。審計報告揭發處方○七年取得逾十五億元撥款，更換空管系統，原定一二年啟用，結果超支九千萬元，仲要拖到依家都未能啟用，你話係咪敗家吖。仲有吖，處方早年購買跑道監察雷達，當時顧問已經警告有技術限制，點知處方一於少理，照買可也，最終又係有得睇冇得用，納稅人嘅錢等於掟落鹹水海，都咪話唔冤枉。不可不知，家陣空管系統已經嚴重超負荷，新系統又得物無所用，諗起都牙煙，一旦爆起大鑊，責任邊個孭得起呀。
講真吖，民航處近年醜聞多多，又點止大花筒、入錯貨咁簡單。當年有份參與審批空管系統標書嘅前民航處總航空交通管制主任梁沛光，離職後居然加入美國供應商喺香港嘅分判公司，當中有冇延後利益先？羅崇文一直死撐梁沛光冇參與審批，直至本報踢爆至死死地氣改口，你話唔係官官相衞都冇人信喇。照咁睇嚟，除咗審計署應該繼續跟進，廉署都有必要開快勞調查咯。
唉，回歸後官風敗壞，大官有大官貪，細官有細官腐，難怪好多人慨嘆，唔使「五十年不變」，港產官僚迅速國產化，好快就一國一制。本來呢，當局大可以整頓民航處，殺一儆百，重整官風，但睇老廉查貪曾、貪湯查咗咁耐都冇下文，指望佢哋拍蒼蠅打老虎喎，盞嘥氣啦。