政情：田二少收老人院促銷電話
立法會議員田北辰（田二少）喺尋日立法會會議上提出質詢，要求政府規管「人對人」嘅促銷電話，佢仲好激氣話，有時去歐洲每日收到三、四個促銷電話，而且咩類型促銷都有，每接一次就收港幣大約二十八元，每日淨係聽呢啲電話已經唔見約一百元，大呻「好重皮」！
田二少話，港人每人一年收到一百五十個促銷電話，生活受到嚴重滋擾。以佢為例，每日都收到四、五個「白撞」電話，例如有財務公司問佢要唔要借錢、教育機構推銷英語進修課程，甚至有人問佢要唔要入老人院，同一間公司隔日就打來，唔怪得佢咁激氣喇！佢又話，最離譜係有男同事收到推銷子宮頸癌檢查服務，真係唔知好嬲定好笑。
議員黃定光話，對田二少嘅經歷感同身受，皆因佢去外國都收過「午夜凶鈴」。商務及經濟發展局局長蘇錦樑回應話，規管真人促銷電話較為複雜，建議大家喺外國時夜晚熄電話，咁就可以減低金錢上嘅損失喎。唔知咁樣算唔算斬腳趾避沙蟲呢？