政情：白鴿違泊 議員陪食牛肉乾
執達主任周二於中信大廈出入口「清障」，令龍匯道交通重新開通，但由於通往立法會停車場嘅添美道仍然被佔領人士霸佔，因此立法會議員座駕除咗泊喺附近合法車位外，就要違泊喺中信大廈對出迴旋處旁行人路上。據聞尋日有四人被抄牌硬食「牛肉乾」，包括有傳三名議員「中招」，分別係金融界吳亮星（星爺）、泛民議員湯家驊及黃毓民，但經過明查暗訪，原來真正「累街坊」嘅「元兇」，係「清障」當日有份現身嘅民主黨（白鴿黨）成員張賢登。
多名議員聞風駛走避劫
張賢登接受查詢時證實，其座駕於昨晚六時四十五分左右，於中信大廈露天停車場非泊車位，上落發電機，前後只有十五分鐘左右，就遭警員抄牌，因此要求警員對附近一帶行人路嘅違例泊車都公平執法，再三強調「累唔累街坊唔係我引發」。
不過，據聞該批違泊車輛屬於議員座駕，有多名議員或其司機疑「聞風」及時駛走車輛，現場所見違泊車輛分別接載建制派議員梁君彥、梁志祥、陳婉嫻等人。當警員抄牌時星爺座駕並無駛走，結果硬食「牛肉乾」，有傳另外仲有兩人「中招」，分別係湯家驊同黃毓民。
星爺：或向戴耀廷討償
星爺同湯家驊事後均證實其座駕被「抄牌」，星爺形容事件屬無妄之災，不排除會參照個別人士嘅做法，入稟小額錢債向佔中發起人戴耀廷追討賠償。至於湯家驊亦感到「少少無辜」，並透露事件另一版本，就係源於有人嘅座駕泊咗中信附近露天停車場嘅傷殘人士泊位，其後被警員抄牌，有人不滿，並且要求警員對附近嘅違例車輛公正執法。
公道啲講，多名議員今次硬食「牛肉乾」，其實都同佔領行動有莫大關係，如果唔係入唔到立法會停車場泊車，都唔使周圍去搵位泊車，甚至違例泊車。不過，就算係咁都唔應該違泊，事關佔領行動不知何時了，大有機會再次因為貪方便而中招。