政情：中環出更：孔美琪難忘兒時練琴辛酸
現代競爭激烈，小孩即使有十八般武藝，家長仍覺未夠。尋日聯合國兒童基金香港委員會舉辦「零．可以成真」短片項目啟動禮，公開九十二段由本地青少年拍攝的一分鐘短片，揭示本地青少年面對的壓力，又指子女需要每日最少一小時的遊戲時間。講起怪獸家長現象，委員會副主席、維多利亞教育機構總校長孔美琪（Maggie）就大爆當年嘅練琴辛酸史。
Maggie話，佢曾經好鍾意彈鋼琴，但中學時媽咪丁毓珠要佢追番考級進度，焗住每年都要狂練考試嗰三首歌，冇得彈自己鍾意嘅歌曲之餘，仲連中學最寶貴嘅食晏時間都貢獻咗畀鋼琴老師惡補琴技，犧牲咗與同學相處嘅開心時刻，冇幾耐仲因為彈到悶，令佢對鋼琴嘅熱情磨滅貽盡。佢話，其實學咩興趣班都好，最緊要係享受，比賽亦唔一定要贏，人生咁多挫折，學識點面對失敗更重要。
麥曦茵：自己畀壓力
新一代導演兼活動大使麥曦茵就啱啱相反，父母知佢讀書成績一般亦冇點催谷佢，任佢發展個人興趣，反而因為自己埋首藝術工作追求完美，無形中畀咗壓力自己，但佢話只要係鍾意嘅嘢，完成到就會好滿足。
至於委員會主席陳晴（Judy）就覺得家長同子女有溝通先係最重要，佢細個都學過書法、鋼琴、舞劍等，可以話文武雙全，但係佢一啲都唔覺得辛苦。佢嘅父母亦好重視親子關係，教佢定期寫日記畀父母睇，所以佢一有壓力或唔開心，就可以同父母反映，唔使當面講咁尷尬喎，不過佢笑言寫到十三、四歲就開始收埋唔畀父母睇喇！
卓妮