機管局管理混帳，搞到機場保安形同虛設，已經夠晒離譜嘅喇，諗唔到佢哋仲擘大眼講大話，欺騙公眾，誠信破產，簡直係沒有最醜，只有更醜。
本報去年曾經報道，一名市民喺機場行李認領區目擊盜竊案發生，機場保安居然袖手旁觀，賊人最終逃去無蹤；該名市民要求機管局翻查錄影，查明真相，卻獲覆閉路電視僅作即時監控之用，其後本報就事件查詢，得到嘅答案亦係話閉路電視用以「監察大堂運作」，並以保安為由，拒絕透露系統詳情。正所謂，真的假不了，假的真不了。該名市民向申訴專員公署投訴=，事隔一年幾，調查終於有結果嘞，揭發機管局大話連篇，涉事閉路電視具備錄影功能，而且踢爆機管局有指引要求職員佯稱閉路電視只作即時監控，申訴專員炮轟有關做法不可接受。
機管局仲有冇離譜啲吖？自己弄虛作假已經夠衰嘅喇，仲要求職員講大話欺瞞公眾，難怪機場管理一塌糊塗，千瘡百孔喇。最不堪嘅係，機管局仲要死雞撐飯蓋，明明係自己發指引教職員講大話，卻聲稱事件中有職員未如實披露資料，被公署批評有卸責之嫌，對員工不公平，認為機管局管理層需要改變心態，以維持誠信。
唉，機管局一而再地被踢爆不盡不實，隱瞞真相，仲有乜誠信可言吖，知唔知醜字點寫吖。機場保安出現漏洞畀盜賊有機可乘，本來已經抵鬧，發生竊案後居然置身事外，甚至連市民要求翻查錄影都諸多推搪，咁樣係保障旅客咩？係保障賊匪咋！咪話功夫茶踢爆吖，機管局尸位素餐，整個機場保安系統就好似嗰套閉路電視系統一樣，根本只係得個樣，不法之徒有恃無恐，仲唔為所欲為咩。
講開又講，機場保安形同虛設，大家都見怪不怪咯。呢，本報早前揭露，機場離境大堂保安鬆懈，背囊客竟可通過金屬探測器直闖禁區，保安人員又係袖手旁觀，闊佬懶理；空郵中心安檢人員當值時同樣魂遊太虛，有人玩手機，有人瞌眼瞓，成個無掩雞籠咁款，郵包炸彈隨時乘虛而入。最誇張嘅係，有人大模廝樣走入捷運系統管道，如入無人之境，搞到系統癱瘓數小時。香港國際機場作為本港對外嘅第一道門戶，保安甩甩漏漏，就算好彩無發生大鑊嘢，都失禮死人喇，吓話！
不怕一萬，只怕萬一，機場保安粗疏等於開門揖盜嘅咋，世界並不太平，出咗事邊個負責得起吖。機管局管理層唔該做好份工，唔好再遊魂得唔得？唔好再呃人得唔得？如果怕交出錄影資料會將機場保安甩漏嘅醜態暴露人前，咪加強管理，督促前線員工做好啲囉，咁至係正途0架嘛。