政情：青委會開會 半個鐘即散水
近年嘅示威活動出現咗唔少八、九十後嘅新面孔，持續咗五十幾日嘅佔領行動，更反映出青年問題。負責青年範疇嘅青年事務委員會，過往經常被人批班委員年紀大，未真正反映時下年輕人嘅想法，雖然近年加入咗一批後生委員，但似乎仍未能掌握年輕一代嘅動向。睇番委員會每個年度只係開四次會，最近一次會議只係開咗短短半個鐘就散水，部份委員甚至缺席，認真兒戲，試問點樣就青年問題對正下藥呢？
「循例問意見 冇就完會」
青年事務委員會喺本周二舉行會議，議程包括交代委員會轄下四個工作小組嘅工作，但過程以流水作業式交代工作進度，雖然主席陳振彬（Bunny）喺每個議題之後都循例問下委員有咩意見，但大家都冇咩異議，所以會議短短半個鐘就完會。今次會議仲完全冇任何關於佔領行動嘅內容，下次再開會已經係明年二月嘅事。
Bunny話，佢有落過旺角同金鐘，同啲後生仔有傾有講。至於點解滿足佢地真普選訴求，佢話會加強溝通平台，了解多啲佢哋嘅訴求，但溝通過唔代表一定會依照佢哋嘅意願去做喎！Bunny又話，普選冇真假之分，呼籲年輕人放眼世界，因為社會由唔同階層組成，唔淨只得年輕人。