香港地四圍都係都市炸彈，唔係塌樹就係塌樓，唔係冧招牌就係高空擲物，唔怪得有人話，市民出街都係戴定鋼盔穩陣啲。計功夫茶話齋，淨係戴鋼盔係唔夠嘅，想出入平安，仲要識輕功空中飛至掂。
唔係功夫茶誇張o架。話說尋日朝早，有位男士喺銅鑼灣渣甸街泊完車準備返工，點知行行吓突然DUM一聲唔見咗影，望真啲原來係跌咗落個四米深嘅大窿度。佢最終由消防員救出送院，雖然好彩冇生命危險，但係肋骨跌斷咗，要瞓幾日醫院。佢憶述當時事出突然，只係短短一秒，根本嚟唔切反應，你話嘞，面對呢個「都市黑洞」，係咪要識輕功凌空飛起至避到吖。
行街竟然遇着地陷，唔單止係無妄之災，直頭係中頭獎都冇咁好彩。如果要用一句歌詞形容呢位先生嘅感受，相信會係「這陷阱，這陷阱，偏我遇上」。呢，當局事後召來田螺車為地洞灌石屎漿，要走幾轉至填得滿，個窿有幾大幾深，可想而知啦。好多市民聽到呢單嘢都話聞所未聞，以後為安全計都會兜路走咁話。
今次意外成因係乜，仲要查過至知，有人估計同隔籬地盤今個月初發生路陷事件有關。嗱，呢個講法唔係冇根據o架，正如學者話齋，如果有地盤進行挖地基工程時，不斷抽走大量地下水，可能連周邊嘅泥沙都抽走埋，形成中空，當地面承受唔住壓力同重量時，自然就會崩塌。家陣基建工程唔係少數，當局監管又形同虛設，全港有幾多地下中空，幾多隱形地陷，根本冇人知。話時話，呢次地陷事故未搞出人命，已經還得神落，但唔係次次都咁好彩o架。
點講都好喇，地陷呢家嘢後果可大可小，絕對唔講得笑。好似深圳咁吖，淨係去年就有六人被地洞吞噬，搞到人心惶惶，仲催生「走路死」呢個新名詞添。所以咯喎，唔該相關部門做好呢份工，填好呢個窿。當然喇，淨係填好呢個窿唔夠嘅，仲要嚟個全港大巡查，一發現有類似情況即時處理。
講到呢度，功夫茶不期然有少少擔心。你知啦，一個和尚擔水飲，三個和尚無水飲，港產官僚最興互相扯皮卸責，樹木管理、打擊阻街、取締僭建、檢查危機，有邊次唔係你推我讓，有邊次唔係愈管愈亂？咪畀人睇死，路政署、建築署等衙門一向官老爺作風，甩漏醜聞不斷，唔好連檢查路面都搞出大頭佛呀。
一句到尾，家陣香港已經七國咁亂，烏煙瘴氣，萬一再整單「走路死」出嚟，呢隻鑊冇人孭得起o架！