政情：梁繼昌寸陳健波「港式英文」
呢個世界有冇標準英文發音就言人人殊，有啲人認為英式英語先至係正宗，亦有人話各處鄉村各處例，新加坡、印度人講英語都有口音係正常不過。話說立法會《2014年強制性公積金計劃（修訂）條例草案》尋日開會，積金局派出規管及政策總監及執行董事馬誠信（Darren McSHANE）解釋法案，但佢係澳洲大律師，英語有啲口音，發言後隨即就惹來一場風波。
陳指積金局代表「難聽」在先
當馬誠信發言後，法案委員會主席、保險界議員陳健波就坦言：「其實我覺得馬誠信先生嗰啲英文好難聽，因為佢啲tone（語調）我覺得好難聽，不過大致都聽到」，相信佢唔係講緊唔好聽，而係聽唔明。跟住發言嘅會計界梁繼昌（Kenneth）當場冇反駁，但事後就喺社交網站貼文，話當堂嚇一跳。佢話唔同國籍人士嘅口語都會有他們嘅口音，應該要尊重，質疑「人哋都未話你啲港式英文啦」！
Kenneth又話，最近有英語教學機構發表報告，話香港人嘅英語水平排名跌至三十一位，落後多個亞洲國家及城市，「喺咁嘅背景下，陳議員係咪應該先反省一吓自己啲英文先呢？」