佔領行動凸顯政府同青年人嘅洪溝，相信下年度《施政報告》對青年政策會有唔少着墨。據聞，身負青年事務同公民教育政策嘅民政事務局，除咗諗吓有乜新政策可以推行之外，局長曾德成都要搵同事惡補吓最近年輕人嘅「潮語」，唔係到時出來嘅政策九唔搭八就唔好啦！我哋聽聞，德成局長嘅同事介紹咗「膠」呢個字，但就唔知點樣解釋畀佢聽，或者局長自己可以買本潮流刊物睇吓，話唔定仲容易理解青年人想法。
其實政府多個政策局都會涉及青年人，好似政制及內地事務局就要諗計點樣宣傳《基本法》；教育局就涉及係咪將中史科重新設立為必修科、通識科內容係咪要多加國家認同；勞工及福利局就要幫年輕人搵工；運輸及房屋局同發展局諗計興建平價上車盤畀青年人，仲有政黨建議喺中央政策組下設青年諮詢組織等。不過，搞咁多嘢，參與佔領嘅一班年輕人，唔少都係為咗爭取「無篩選」嘅普選，唔知有咩青年政策可以搞得掂呢？