中環出更：戰勝病魔「明」謝老友
名醫也有被病魔折磨時，香港醫療專業人士協會（醫專會）創會主席江明熙醫生（Bernard），去年大病一場，留院四個月，一度擔心飯碗不保，幸得好友鼓勵重新振作。患難見真情，Bernard日前舉辦醫專會慈善晚宴籌款，藉此憑歌寄意，答謝好友不離不棄。
病愈復出嘅Bernard獲官員及名醫老友團撐場，包括中文大學副校長及兒科講座教授霍泰輝、牙醫學會會長梁世民、「朱大腸」朱建華醫生、醫學會會長史泰祖及前會長謝鴻興、香港大學校務委員會主席梁智鴻、東華三院前主席陳文綺慧及夫婿陳宇齡等。雖然佢哋個個平時好忙，但當晚就坐足全場。
獲承諾「飯碗與共」
老友咁畀面，Bernard致詞時有感而發話，經歷一場大病，先知身邊有真心朋友。雖然自己係醫生，但能醫不自醫，病重時全靠朋友送上「良藥」，每朝由醫院車佢行山，風雨不改，結果行出奇迹。佢坦言，曾擔心無法再做醫生，生活唔知點算，點知好友拍心口承諾「飯碗與共」，令佢明白人間有真愛。
Bernard呢番話，聽到台下班名醫眼濕濕。萬句多謝，都唔及送上一曲實際，Bernard仲高歌一曲《光輝歲月》，唱出心聲。謝鴻興亦興之所至，拎起支咪和唱。而製衣商人趙汝勤更即場贊助三百件保暖衣義賣。今個聖誕節，Bernard嚟緊將聯同副主席鄭淇德等人搞送暖行動，送出一千部二十四吋電視及八百件保暖衣，與老人家歡聚一堂。
卓妮