政情:連踩51日 許Sir畀屋企人詐型

黃竹坑警校尋日舉行見習督察及學警畢業禮,近期火速爆紅嘅警察公共關係科總警司許鎮德(許Sir)都有出席,個個於是爭住同佢影相。見許Sir容光煥發、笑容滿面,仲同記者們大玩自拍,以為佢早前「息影」幾日叉足電啦,點知佢自爆由九月二十六日開始,連續五十一日都無放過假,仲被屋企人詐型添!

許Sir又話,佔領行動最初個幾星期,每日瞓得個兩個鐘,除咗要主持記者會,每晚仲要睇實佔領行動嘅最新發展,真係陰功。不過,佢強調呢段期間係自願加班,完全無諗過要補假,但佢話依家成個警隊都係咁,唔係淨係佢一個,希望香港盡快回復正軌。許Sir休息咁少,但皮膚仲係咁好,佢就透露呢七個星期飲咗十五支保健飲品先至保持住個精神樣;最後佢仲約傳媒朋友喺完咗佔領行動後去打羽毛球喎。唔知呢場波幾時先打得成呢?

第一手消息請下載on.cc東網iPhone/iPad/Android/Windows Phone Apps