中環出更：李秀恒做「廠」長立會代表添變數
中華廠商聯合會改選會長前日落幕，最終由李秀恒勝出。呢次選舉代表廠商會新舊勢力消長，兩陣營喺選舉過後能否大團結仲未知，不過外界已將焦點放落一六年廠商會立法會代表人選上。現任議員林大輝走人幾乎已成定局，聽聞現任會長施榮懷（Irons）同副會長吳永嘉（Jimmy）都有興趣問鼎立法會議席，唔知李秀恒正式出掌會長一職後，有冇影響兩人嘅行情呢？
倘爭持不下 要搵和事「老」
眾所周知，Irons爸爸施子清同埋Jimmy外父盧文端係結拜兄弟，如果兩位後生爭持不下，勢必影響兩家人感情，所以預計老人家唔會想見到局面搞到咁僵，應該會坐低傾掂佢。我哋尋日問過盧文端，佢就哈哈笑咗幾聲，話現時言之過早，而且議席一職唔係佢話邊個做就邊個做，主要視乎一眾廠商會會員意願喎！
除咗施、吳二人，以李秀恒為首嘅新勢力亦不能忽視。有廠商會中人認為，李派中以飲食界黃家和呼聲最高，但亦要留意李秀恒有冇興趣親自上陣。所以，廠商會未來肯定好戲連場。