成日話年輕人係未來社會主人翁，但見到今日有啲後生仔無心向學，沉迷街頭鬥爭，甚至將違法視為英雄壯舉，相信唔少人都會搖頭嘆息︰「唉，都唔知讀咩書嘅！」
問得好！年輕人之所以愈來愈激進，愈來愈暴戾，咪因為教育出咗問題囉。呢，前排考評局公布今年中學文憑試通識教育科嘅考試報告撮要，批評考生錯誤將「法治」等同執行法例，有啲更加淨係將法治詮釋為遵守法律，扮晒法律專家咁款。
喂，呢個評分標準一睇就知荒唐透頂喇。如果執行法例、遵守法律唔等同法治，唔通抗法拒捕、違法亂紀先至係法治？有法律界出身嘅立法會議員就鬧得啱嘞，呢套標準有誤導之嫌，考評局有責任向公眾交代。老實講吖，有啲評分標準已經唔係誤人子弟咁簡單，直情係毀人子弟，例如有道題要求考生根據兩張示威照片，指出港府管治嘅兩項困難，結果攞最高分嘅居然一面倒引用反對政府嘅資料，你哋話嘞，通識內容咁反智，咁荒唐，年輕人耳濡目染，第時一個二個「長毛」上身，造反有理，仲邊有前途吖。
最得人驚嘅係，霸街嘅年輕人舉一反三，將呢套咁另類嘅「法治觀」運用得出神入化。法庭對佔領區頒下禁制令，有人居然聲稱人多就安全，人少就危險，公然號召更多人留守。又難怪嘅，法治唔等於執行法例吖嘛。又有學生領袖話喎，佔領人士有朝一日「自首」，就係彰顯法治而唔係破壞法治喎。如果呢個邏輯成立，係咪只要「一人做事一人當」，就可以殺人放火為所欲為呢？
講開又講，香港教育早就政治化甚至洗腦化，通識科只係冰山一角咋。早前有幼稚園老師懷疑向學童灌輸警察係壞人嘅形象，甚至有幼稚園透過繪畫向學生灌輸支持佔領嘅理念，小朋友牙仔都未出齊，就被訓練成為政治動物，憎惡執法者，第時大個唔獻身街頭抗爭至奇喇。
通識科唔教通識，而教人點樣反政府、點樣唔守法，你話香港幾咁荒謬，教育幾咁混帳。有人要求取消通識科，唔係冇道理0架。之不過咁，就算取消通識科，唔代表可以救番年輕一代。係人都知，壹淫媒誨淫誨盜，反中亂港，日日鼓吹歪理邪說，唔少年輕人畀佢洗咗腦，習非成是。對於佔領運動，淫賤黎唔止出錢出力，瞓身支持，更不斷鼓勵年輕人上京「博拉」添。佔領運動死唔斷氣，咪就係因為淫賤黎不斷煽風點火囉。
都係嗰句啦，淫媒不死，港難未已。繼續縱容洋奴餘孽、淫媒政客搞風搞雨，為禍下一代，唔單止校園政治化，整個香港陸沉都似！