好多打工仔日捱夜捱，都係為供樓及儲筆錢退休，然後靠收租或收息安享晚年。原來有錢佬同打工仔都擁有同一夢想，只不過大家筆錢唔同數目啫。
話說某位立法會前議員，近年過住優悠自在嘅退休生活，最近更決定一次過將十億身家存入銀行，每年淨係靠約三千萬元利息作為生活費，呢啲真係俗語話嘅「打跛腳唔使憂」。
每月30萬請客豪擦
話說呢位前議員最鍾意請客，唔少政商界名人亦都好鍾意同佢食飯，近年佢轉趨低調，但每個月使費仍然驚人。
最近佢就同人分享過自己嘅退休計劃，原來佢一次過擺咗十億元入銀行，只係食息都夠過埋下半世。佢計過條數，撇開其他使費，每個月都有三十萬元用嚟飲飲食食，所以每逢同人食飯都主動埋單，非常好客。
眾所周知，呢位前議員奢華風光過，亦曾經跌過落谷底，平時最大支出當然唔係飲飲食食，而係另一種特別嗜好。不過，無論點都好，呢招「十億食息」對普通打工仔來講，都係得個望字。